మన్యసీమ శతకము
🙏🙏💐💐🌿🌿💐💐🙏🙏
రచన :కడబాల నాగేశ్వరరావు
ఉపాధ్యాయులు ,ఆశ్రమ ఉన్నత పాఠశాల
ముసురు మిల్లి , రంప చోడవరం (మండలం)
తూర్పు గోదావరి జిల్లా ,ఆంధ్రప్రదేశ్, పిన్ :533288
సెల్ నంబరు :7382356659
1.శ్రీలుపొంగు నట్టి సీమరా మన్యంబు
వాగులున్న నేల వసుధయందు
కొండ కోనలున్న నిండైన గిరిసీమ
మన్యసీమ లోని మాణ్యచరిత.
2.చక్కదనము నుండు సౌధాలు లేవయ్య
చల్లదనము నిచ్చు సౌఖ్యమిచ్చు
యుల్లమందు నెపుడు చల్లని పవనాలు
మన్యసీమ లోని మాణ్యచరిత.
3.ప్రకృతి కాంత తోడ బరవళ్ళుత్రొక్కుచు
నాడుచుంద్రు జనులు హాయిగాను
నాగరికతను విడిచి నయమైన బ్రతుకును
మన్యసీమ లోని మాణ్యచరిత.
4.సాధువర్తనంబు సచ్ఛీలభావంబు
నీదు సొమ్ము గాదె నిజము గాను
స్వదు భాషణంబు చక్కని గమనము
మన్యసీమ లోని మాణ్యచరిత.
5.ప్రకృతి చిత్రణంబు పరిణతి రూపంబు
మూర్తి మత్వ మొందు ఆర్తి తోడ
మందహాసమెపుడు చిందులు వేయంగ
మన్యసీమ లోని మాణ్యచరిత.
6.మాటచూడ నీకు దేటగానుండును
యాస కొంతయుండు బాసయందు
యాస యున్న నేమి? మోసంబు లేదుగా
మన్యసీమ లోని మాణ్యచరిత.
7.నీదురూపు చూడ నిక్కమైనదిరూపు
కొండవాడుఅంటె కుంగి పోకు
కొండ వాడనంగ కొండౌన బండౌన
మన్యసీమ లోని మాణ్యచరిత.
8.కొండవాడనుచును గుటిలాన ప్రజలెల్ల
పల్కగానె నీదు పాపమెల్ల
తొలగిపోవునయ్య తొందరలోననే
మన్యసీమ లోని మాణ్యచరిత.
9.కొండవాగులందు మొండిగా బ్రతుకుచు
వేటలాడు నట్టి వీరుడవుగ
దుష్టజంతుతతిని తుదముట్ట నేతెంచు
మన్యసీమ లోని మాణ్యచరిత.
10.తొల్లి నుండి చదువు తల్లి నెరుగలేదు
ముళ్ల కంచెలున్న పొదలయందు
సంచరించునట్టి సంచారజీవుడా !
మన్యసీమ లోని మాణ్యచరిత!
11) తొల్లినుండి ప్రభుత తోరంబునా నీకు
నేమి చేయలేదు? ఏది లేదు!
ఏకలవ్య రీతి ఏకాకి వైనావు!
మన్యసీమ లోని మాణ్యచరిత.
12) ఏమి చేయలేదు ఎవ్వారు చూడరు
కంచెలందు ముళ్ళ కంపవోలె
నిలిచి యున్న నేమి? నీకీర్తి తగ్గదు
మన్యసీమ లోని మాణ్యచరిత.
13) పువ్వునుండి భ్రమరి ముదముతో మధువును
తేనెపట్టులందు తేర్చి నింపు
అట్టి తేనె పట్టు లానంద మేనోయి
మన్యసీమ లోని మాణ్యచరిత
14) అడవి లోన నీవు ఆనందమొందుచు
అడవి ఫలములన్ని అనుభవించి
స్వేచ్ఛ తిరిగెదీవు స్థిరమైన బ్రతుకుతో
మన్యసీమ లోని మాణ్యచరిత
15) దుష్ట జంతువనుచు దూరంబుగా జనుల్
పారిపోవు చుంద్రు వనములోన
దుష్టజంతు కోటికిష్టంబు నీవెగా.
మన్యసీమ లోని మాణ్యచరిత.
16) మంచి వానిఁజూచి మర్యాద వర్తించు
సహజవైరముడిగి సంచరించు
వనములోననున్న ప్రాణులెల్లప్పుడు
మన్యసీమలోని మాణ్యచరిత.
17) దారి గాచి జనులు దయవీడి చంపుచుఁ
బెరిగె “బోయ”యొకడు గిరులయందు
సత్యభావమెరిగి సద్భావమబ్బెను
మన్యసీమ లోని మాణ్యచరిత
18) కొండకోనలందు బండబ్రతుకుమాది
చెట్లనీడలందు చెత్త మేము
తల్లడిల్లవద్దు తాపందు వీడుమా
మన్యసీమలోని మాణ్యచరిత.
19) అడవి లోనఁబుట్టి అడవిలోఁదిరుగుచు
నడవియందు ప్రాణమంతరించు
ననుచు దిగులు మాని ఆనందమొందుమా
మన్యసీమలోని మాణ్యచరిత
20) అడవిలోనఁబుట్ట నన్యాయమే గాదు
అడవిలోనఁబెరుగ నెడమ కాదు
అడవిలోనఁదిరుగ నౌన్నత్యమబ్బును
మన్యసీమలోని మాణ్యచరిత.
21) చెట్టుపుట్టలందుఁజెంగున నెగురుచు
నున్న లేడిపిల్ల మిన్నగాను
నీదు చెలిమినెపుడు నిత్యంబు కోరును
మన్యసీమ లోని మాణ్యచరిత !
22) చెట్టుపుట్టలందుఁ జెదపుర్గు భక్షించి
వృక్షశాఖ లెక్కు పెద్ద ఎలుగు
మిమ్ముఁజూడగానె మేనటుత్రిప్పును
మన్యసీమ లోని మాణ్యచరిత !
23) అడవి లోన మదిని ఆనందభావాన
పురిని విప్పి నెమలి ముదము నాడు
నెమలివోలె నీవు నిండైన వాడవు
మన్యసీమ లోని మాణ్యచరిత !
24) అడవిలోన తిరిగి అట్టహాసమ్మును
జేయుచుండు పులియు స్థిరముగాను
పులికి జంకవెపుడు తలపులోధైర్యంబు
మన్యసీమ లోని మాణ్యచరిత !
25) అడవి సంచరించు గడుసైన జంతువుల్
వనములోనఁదిరుగు పక్షులెల్ల
మీకు చెల్మిగాదె మిక్కుటంబుగఁజూడ
మన్యసీమ లోని మాణ్యచరిత !
26) అడవిలోన దొరుకుఆహారసంపదల్
కొదువగాదు నీకు కొలచి చూడ
వనమునందునున్న ఘనమైన ఓషధుల్
మన్యసీమ లోని మాణ్యచరిత.!
27) వానకాలమందు వరుణమూర్తిని గొల్చి
పూజఁజేతురంత ముదముగాను
వర్షకాల హేతు ఫలము కొల్వగ మేము
మన్యసీమ లోని మాణ్యచరిత !
28) ఘనతకెక్క మేము గంగను కొల్తుము
నాడుచుందుమయ్య హాయిగాను
గంగ కొలచి మేము రంగాన నర్తింతు
మన్యసీమ లోని మాణ్యచరిత !
29) ఎన్ని యుగములయిన ఎన్ని కష్టములైన
నోర్చుకొందుమయ్య నోరు విడక
“పెద్ద”మాటనెపుడు వినయాన పాలింతు
మన్యసీమ లోని మాణ్యచరిత !
30) ఎంత దూరమైన సుంతైన కష్టంబు
తలచకుండ మేము ధైర్యమలర
నడచుచుందు భువిని నాందబు చేయుచు
మన్యసీమ లోని మాణ్యచరిత !
31) ఆదికాలమందు వేదసంతతి మేము
ఎరుగమయ్య మదిన ఎడమలేదు
సరసమైన బాణి జానపదులమేము
మన్యసీమ లోని మాణ్యచరిత !
32) పెళ్ళివేళలందుఁ బెద్దగా వేడుకల్
సలపుకొందుమయ్య చక్కగాను
తలకుకొమ్ములుంచి వలపు నాట్యాలతో
మన్యసీమ లోని మాణ్యచరిత !
33) వియ్యమందు వేళ వితైన వేడుక
ఎగిరి చేతుమయ్య హితము గాను
తాడి చెట్ల కల్లు దండిగాఁద్రాగుచు
మన్యసీమ లోని మాణ్యచరిత !
34)రేయి పగలు మేము రేలయో రేలంచు
పాట పాడు తాము భావమలర
గ్రామమందునున్న ఘనమైన పెద్దల్తొ
మన్యసీమ లోని మాణ్యచరిత !
35) మనమునందుఁజూడ మాలిన్యమే లేదు
మాటలందు మాకు సాటి లేదు
తెలుగు భాష మీద తెలుగు సంస్కృతి మీద
మన్యసీమ లోని మాణ్యచరిత !
36) కొండమాటులందు నిండైన మనసున్న
జీవి తంబు మాది, జీవనంబు
మారు రూపు మాది మర్యాద మించిన
మన్యసీమ లోని మాణ్యచరిత !
37) దొంగతనము లేదు దొరతనమునులేదు
మంకుతనము లేదు మహిన మాకు
వాక్కు నందు ఫలము వశ్యమైయుండును
మన్యసీమ లోను మాణ్యచరిత!
38) ఏమి పాప ఫలమొ ? ఏమి శాప ఫలమొ ?
వనము నందు మేము మునుల వోలె
మూగవోలె నున్న మోదంబు విడువము
మన్యసీమ లోని మాణ్యచరిత!
39) కొండలందు పుట్టి బండలందుపెరిగి
పొంగు చున్న వాగు వోలె మేము
శుద్ధమనముకల్గి శుద్ధగిరిజనులం
మన్యసీమ లోని మాణ్యచరిత !
40) రివ్వు రివ్వు నెగురు గువ్వబోలిక మాది
సాగిపోదు మెపుడు సత్వబుద్ధిఁ
ఐక్యమత్య గుణము ఆవశ్యకంమాకు
మన్యసీమ లోని మాణ్యచరిత !
41) కుటిలబుద్ధి తోడఁ గొండసంపద దోచి
హానిచేసి నారు ఆంగ్లజనులు
వారికెదురు నిల్చి వనమును గాపాడు
మన్యసీమ లోని మాణ్యచరిత !
42) దుష్టభావమరల దోపిడీ చేయుచు
నెత్తి కెక్కి నారు మత్త జనులు
అట్టి మత్త జనుల గట్టిగా నెదిరించు
మన్యసీమ లోని మాణ్యచరిత !
43) మన్యమందు జనుల మానంబు దోచుచు
నిష్టరీతి దొరలు ఏలుచుండ
సింహరీతి “రాజు”సింహనాదముజేసె
మన్యసీమ లోని మాణ్యచరిత !
44) ఆంగ్ల పాలనమున హాయిలేకను మేము
కష్టమొంది నాము కానలందు
నారణాలకూలి కారుడబ్బులులిచ్చె
మన్యసీమ లోని మాణ్యచరిత !
45) సీమనుండి ధనము చేతపట్టుకువచ్చి
కొట్టు పెట్టి మమ్ము కొల్ల గొట్టి
కుటిల బుద్ధి జనులు కుళ్ళుఆంగ్లేయులు
మన్యసీమ లోని మాణ్యచరిత !
46) ఎన్ని దినము లైన ఎన్ని యుగములైన
వాస్తవమ్ము కనుము వసుథయందు
కొండకోనలందు నిండు బతుకు మాది
మన్యసీమ లోని మాణ్యచరిత!
47) కోయ, మన్నె, చెంచు కొండకమ్మరయంచు
కొండదొరలు ఎరుక కొండరెడ్లు
వివిధ జాతులున్న వేరేది లేదన్న
మన్యసీమ లోని మాణ్యచరిత!
48) ఆంగ్ల జనులు మాకు హాయినిఁబోగొట్టె
శాసనంబుఁజేయ శాంత మొంది
ఎన్ని బాధలయిన నింపుగా సహియించె
మన్యసీమ లోని మాణ్యచరిత !
49) తేనె పట్టులందుఁ దేనెనంతను గ్రోలి
చెట్లఫలములన్ని సేకరించి
వన్యఫలము చేత ధన్యుండవైనావు
మన్యసీమ లోని మాణ్యచరిత!
50) మబ్బుమొగిలుఁజూసి యుబ్బిపొంగుచు నెమ్మి
పురిని విప్పి యాడు ముదము గాను
అట్టి దృష్యఁమాది ఆనంద భావానఁ
మన్యసీమ లోని మాణ్యచరిత!
51) ఘనత చెంది నట్టి గాముగంటందొర
మల్లుదొరల పేర్లు మరువమెపుడు
వారివోలె దేశభక్తితో నిలిచెదం
మన్యసీమ లోని మాణ్యచరిత!
52) దొరల పెత్తనంబు తురగంబువలె సాగ
బారతంత్య్రమొందె భరత భూమి
కొండ లందు మాకు గుండెలుప్పెంగురా!
మన్యసీమ లోని మాణ్యచరిత!
53) దైవదత్త మయిన తరులసంపదనెల్ల
కొల్లగొల్లనారు తెల్లదొరలు
వనములోనఁ బుట్టి వనమురక్షింపుమా
మన్యసీమ లోని మాణ్యచరిత !
54) రామరాజు తోడ రాజ్యంబు నెలకొల్పి
తెల్లదొరల కెదురు తిరిగి నావు
వన్యప్రాంతమంత స్వాతంత్ర్యముప్పొంగ
మన్యసీమ లోని మాణ్యచరిత !
55) నాది నాది యంచు నాదంబు చేయుచు
దేశమందు స్వేచ్ఛఁదెలిపినావు
ఆంగ్లవైరి శౌరి అల్లూరి బాటలో
మన్యసీమ లోని మాణ్యచరిత !
56) తెలుగు పౌరుషంబు తేజంబు మనదేను
వెలుగు లీను మనకు జిలుగులెల్ల
దేశదాస్య ముక్తి దీతైన అనురక్తి
మన్యసీమ లోని మాణ్యచరిత!
57) ఎవరు వాడు ? దొంగఎటనుండి యిటువచ్చె ?
కొండ బలము దోచు దుండ గీడు
తగినశాస్తి చేసి తరిమెదననె “రాజు”
మన్యసీమ లోని మాణ్యచరిత !
58) వెదురు పొదలనుండి వెదురునరికితెచ్చి
దడులనల్లు తావు దట్టముగను
తేనెపట్టునున్నఁదేనెను తెత్తువు
మన్యసీమ లోని మాణ్యచరిత !
59) ఉదయమందు నీవు ముదముగా చెట్లెక్కి
కల్లు గీస్తవయ్య మెల్లగాను
చల్లదనముతోడ నిల్లిల్లుతిరిగుతూ
మన్యసీమ లోని మాణ్యచరిత !
60) ప్రకృతి కాంత ముద్దుపట్టివి నీవోయి!
అడవితల్లి నీకు నమ్మ గాదె !
వనములోనఁబెరుగు ఘనమైన జీవుడా!
మన్యసీమ లోని మాణ్యచరిత !
61) కొండ జనుల భవిత కొరగాక నుండగ
విద్యనేర్పఁదలచి వివిధగతుల
ప్రభుత “బడులు”పెట్టె ప్రతిపల్లె వెలుగొందె
మన్యసీమ లోని మాణ్యచరిత.!
62) చదువు చెప్పుటకును సౌధాలు నిర్మించె
ఖర్చు పెట్టి నారు ఘనముగాను
సౌధమందచదువ సౌఖ్యాలు కల్పించె
మన్యసీమ లోని మాణ్యచరిత !
63) చదువు నేర్ప గొప్ప సాహిత్య వేత్తలు
గణితశాస్త్రబుధుల గణితమతులు
హిందిపండితాళి ముందుగా వత్తురు
మన్యసీమ లోని మాణ్యచరిత !
64) చదువుకొనగ మనకు చక్కని బడులుండె
పండితుండవగుదు ప్రతిభ కలుగు
చదువులేక యున్న సంస్కార ముండదు
మన్యసీమ లోని మాణ్యచరిత !
65) చదువు కున్న మనకు సాహిత్యమబ్బును
చదువు కున్న మనకు సఫలతగును
చదువులేక పోతె చాలా కఠినమోయి
మన్యసీమ లోని మాణ్యచరిత!
66) చదువు లేక కొండజాతికిఁ చెందిన
పురుషుడొకడు “దొంగ బుద్ధిఁ”బెరిగి
నట్టివాడె చదివి దిట్టయై “సుకవియై”
మన్యసీమ లోని మాణ్యచరిత !
67) రామమంత్ర జపము రమణీయ ఫణితితో
జేయగానె యొకడు సిద్ధుడయ్యె
నట్టివాడె జగతి “నాదికవిగ”మారె
మన్యసీమ లోని మాణ్యచరిత !
68) ఆంధ్రరాష్ట్రమందు నాదిలాబాదులో
“కుమర భీము”యనెడు కొండబిడ్డ
జాతిపౌరుషమును నీతితోనిలిపెను
మన్యసీమ లోని మాణ్యచరిత !
69) కుమర భీము కథలు కువలయమున నేడు
చలన చిత్రముగను జక్కఁదీసి
యాదరించి నారు మోదాన అందరు
మన్యసీమ లోని మాణ్యచరిత !
70) ఆశ్రమంబువలెను హాయిగా నుండెడుఁ
బాఠశాలలోనఁ బాఠములను
జక్కగాను జదువ మక్కువ చూపుమా
మన్యసీమ లోని మాణ్యచరిత !
71) పాఠశాలలందు భక్తితో పాఠాలు
చదువవయ్య నీకు ముదముకలుగు
గురువు నెడల భక్తి గుణము వీడకు యెప్డు
మన్యసీమ లోని మాణ్యచరిత !
72) భోజనంబు మరియు పుత్తకమ్ములనిత్రు
విద్యనేర్పు నట్టి “వినయ శాల”
విద్యలోనె గాదు వినయమ్ము పెరుగును
మన్యసీమ లోని మాణ్యచరిత !
73) కల్ల మాట లాడి మెల్లగా దరిచేరి
పాడు చేతురయ్య పలువలెల్ల
పలువ మాట వినకు పాడగు చిత్తంబు
మన్యసీమ లోని మాణ్యచరిత !
74) అందరొక్కటయిన ఐకమత్యము కల్గు
అందరొక్కటయిన హాయికలుగు
ఐకమత్యమున్న అవనిలో లోటేది ?
మన్యసీమ లోని. మాణ్యచరిత!
75) ఉదయమందు మనము ముదముగా పొలమున
కష్టపడుదు మయ్య ఖరము రీతి
కష్టపడుట లోనె తుష్టి కలదటంచు
మన్యసీమ లోని మాణ్యచరిత !
76) రాత్రి వేళలందు రమణీయ నృత్యాలు
చేతు మయ్య మేము చేతులల్లి
పగలు మేము పడ్డ బాధలు మరువంగ
మన్యసీమ లోని మాణ్యచరిత!
77) నాగరికత కలదు నవ్యమైనది రీతి
హాని చేయు తలపు అసలు లేదు
సత్వ గుణము మాది సద్భావ మగురీతి
మన్యసీమ లోని మాణ్యచరిత!
78) మన్య ప్రాంత మందు మర్యాద కలదండి
ఆశ లేదు మాకు లేశ మైన
వర్తకాళి వచ్చి వైర భావముపెంచె
మన్యసీమ లోని మాణ్యచరిత !
79) వర్తకాళి వచ్చి వసుకాంక్షఁజూపించి
పాడుచేసినారు వర్తకమును
వర్తకాళి కాదు నర్తన మశకాలు
మన్యసీమ లోని మాణ్యచరిత !
80) కపట బుద్ధి వారు కష్టాలు కల్పింత్రు
తిరుగు లేదు మాకు బెరుకు లేదు
మంచివాని కెపుడు మహిలోన విజయంబు
మన్యసీమ లోని మాణ్యచరిత.!
81) మనల వృద్ధిఁజేయ మంచిపనులు నేర్ప
భువిని వెలసెనయ్య పుణ్యరీతి
గిరిజనాభివృద్ధి గిరిజనులకు సంస్థ
మన్యసీమ లోని మాణ్యచరిత !
82) పరిథి పెంచి నారు పథకాలు రచియించి
బుుణము లిచ్చి నారు దినము గడవ
బీదతనము బాపి మోదంబు కల్పించె
మన్యసీమ లోని మాణ్యచరిత !
83) బండలందు పారు వాగులన్నింటిపై
చెక్కుడాములెన్నొ పెక్కుకట్టి
రూప కల్పనంబు రూఢిగాఁజేసారు
మన్యసీమ లోని మాణ్యచరిత!
84) పట్టుపురుగులెల్ల దిట్టగాఁబెరుగంగ
శిక్షణంబు నిచ్చి స్థిరము గాను
చెంత నిల్చినారు “సెరికల్చరీ ”వారు
మన్యసీమ లోని మాణ్యచరిత!
85) కొండపోడులందు బండసేద్యము చేసి
శ్రమను బొందినాము క్రమము లేక
కొండ సేద్యమేమి? నిండునా మన కుక్షి
మన్యసీమ లోని మాణ్యచరిత!
86) మన్య ప్రాంత మంత మామిడి తోటలు
విస్తరింప “ప్రభుత” పెద్దగాను
మావి మొక్కలిచ్చి మన్యంబు జనులకు
మన్యసీమ లోని మాణ్యచరిత !
87) పల్లె పల్లె లందు పాఠశాలలు పెట్టి
వెలుగు నింపి నారు విద్య నేర్పి
అక్షరములు నేర్చి అభివృద్ధి చెందగ
మన్యసీమ లోని మాణ్యచరిత !
88) బీడుభూములందు జీడి తోటలు పెంచి
బాగుచేసినారు వాగులన్ని
పాడి పంట పెరిగి ప్రగతి సాధించాము
మన్యసీమ లోని మాణ్యచరిత!
89) రాత్రి వేళలందు రాత్రి బడులు పెట్టి
చదువు చెప్పి నారు చక్కగాను
పగలు పనులు చేసి పాఠాలు చదవండి
మన్యసీమ లోని మాణ్యచరిత !
90) సాధుజీవనంబు సత్యంపు మార్గము
సత్వగుణము కలిగి సాగి పొమ్ము
నీకు నెదురు లేదు నిత్యంబు సాగిపో
మన్యసీమ లోని మాణ్యచరిత!
91) శబరకులమునందు జన్మంబు పొందిన
భక్తురాలు “శబరి” ముక్తిఁ బొందె
రంజనంబు గాదె రామదర్శన మెప్డు
మన్యసీమ లోని మాణ్యచరిత!
92) శబరి భక్తి తోడ శ్రద్ధగా నెంగిలి
ఫలములిచ్చి ముక్తి ఫలముఁ బొందె
మనమునందు భక్తి మంత్రంబు ముఖ్యంబు
మన్యసీమ లోని మాణ్యచరిత !
93) చక్కగాను మనకు సదుపాయములు సేసి
గిరిజనాభివృద్ధి జరుప దలచి
ఆదరించినారు అధికారబృందంబు
మన్యసీమ లోని మాణ్యచరిత !
94) అనుభవింపు డయ్య అడవి సంపద నెల్ల
దైవదత్త మయిన తరువు ఫలము
అడవి సంప దంత అన్యులదేఁకాదు
మన్యసీమ లోని మాణ్యచరిత!
95) కుటిలబుద్ధి నుండు జటిలమనస్కుల
దరికి జేర బోకు పరిధి దాటి
గుటిలబుద్ధి ఎట్లు కువలయంబున నిల్చు
మన్యసీమ లోని మాణ్యచరిత !
96) ఎండలోనఁ జేతి కండలు కరుగంగఁ
చెట్లు కొట్టెదీవు చేవ తోడ
కండ కలదు నీకు గుండెకలదు నీకు
మన్యసీమ లోని మాణ్యచరిత!
97) సామ్యవాదముడిగి సాధు మార్గము లేక
సంచరించిరయ్య జనులు నేడు
అట్టి మార్గ మీవు గట్టిగా నెదిరించు
మన్యసీమ లోని మాణ్యచరిత !
98) సామ్యవాదమున్న చక్కగా భువిలోన
సకల సిద్ధి కలుగు సత్యమిదియె
ఉగ్రవాద శబ్ద ముల్లమందునఁవద్దు
మన్యసీమ లోని మాణ్యచరిత!
99) ఎన్ని దినములయిన ఎన్ని కష్టములైన
మంచి విజయమందు మహినిఁజూడ
మానవత్వమనెడు మార్గాన పయనించు
మన్యసీమ లోని మాణ్యచరిత !
100 అడవితల్లి యొక్క కడుపు పంట నీవు
అడవితల్లి యొక్క నమృతమీవు
అడవితల్లి కెపుడు నానందమొసగుమా
మన్యసీమ లోని మాణ్యచరిత!
101పాఠశాలలందు బాలబాలికలెల్ల
శతకపద్యములను జదవవలయు
గిరిజనుల వెతలకు గీటురా ఇది నేడు
మన్యసీమ లోని మాణ్యచరిత!
సమాప్తము
ఓం శాంతిః ఓం శాంతిః ఓం శాంతిః
Kadabala Nageswara Rao
Teacher
Govt Tribal welfare High School
Musurumilli
Rampa Chodavaram (M)
East Godavari District
A.P,Pin:533288
